ஆயிரமாண்டுகளின் அன்பு

மனுஷ்ய புத்திரன்

அடையாளங்கள் அல்ல
அடையாளங்களின் அரசியலே முக்கியம்


நான் ஒரு முஸ்லீம் அல்ல
ஆனால் நான் உங்கள் பக்கம் நிற்கிறேன் என
ஹிஜாப் அணிகிறாள் ஒரு இந்து சகோதரி

நாங்கள் முஸ்லீம்கள் அல்ல
ஆனால் உங்களுக்காக
மனித அரணாக நிற்கிறோம் என வரிசையாக
போராட்டக் களத்தில்
தொழுகை நடத்தும் முஸ்லீம்கள் அருகே
கரம் கோர்த்து நிற்கிறார்கள்
இந்துக்களும் சீக்கியர்களும்

நீர்நிலைகளில்
அருகருகே நீர் அருந்தும் மான்களின்
கூட்டத்தை கண்டு
ஆத்திரமடைகிறது பசித்த சிங்கம்
மான்கூட்டத்தை கலைத்து
வேட்டையாட விரும்புகிறது

அரசியல் சட்டத்தை அழியுங்கள்
நீதியை அழியுங்கள்
உரிமை சாசனங்களை அழியுங்கள்
எதனாலும் அழிக்கமுடியாத
இந்த தேசத்தின் ஆன்மா ஒன்றிருக்கிறது
வெறுப்பின் ஆயிரம் கதைகள் நடுவே
அது இடையறாது துடித்துக்கொண்டிருக்கிறது
என் கண்கள் தளும்புகின்றன
இந்த மண்ணை மண்டியிட்டு முத்தமிடுகிறேன்
ஆயிரம் ஆயிரம் ஆண்டுகள்
பழைய மது போன்றது இந்த அன்பு
அதை நீங்கள் அழிக்க முயன்றால்
எங்கள் எல்லா தெய்வங்களும்
ஒரே தெய்வமாகிவிடும்
எல்லா அடையாளங்களும்
ஒரே அடையாளங்களாகிவிடும்
சதுக்கங்களில் கூடும்
மக்களின் முகங்களை பாருங்கள்
ஒரு புனித யுத்ததின் கனல்
அவர்கள் முகங்களில் எரிகிறது
எல்லோரும் எல்லோருக்குமாக நிற்கிறார்கள்
கொடுங்கோலன் அஞ்சுவது
கூட்டத்தை கண்டு அல்ல
சுடுவதற்கு அவர்களிடம் துப்பாக்கி இருக்கிறது

அவன் அஞ்சுவதெல்லாம்
இந்த பெருந்திரள் அன்பைக் கண்டு
அடையாளங்களை கடக்கும்
அடையாள அரசியலைக் கண்டு

இங்கே கடைசி இந்து இருக்கும் வரை
கடைசி முஸ்லீம் இருப்பான்
கடைசி முஸ்லீம் இருக்கும் வரை
கடைசி இந்து இருப்பான்

20.12.2019
பகல் 02.55
மனுஷ்ய புத்திரன்